المقادير:
فرخه متقطعه 8قطع (ونعمل فتحات بالسكينه عند العظم)
1/4 ك فلفل الوان (يقطع شرائح طوليه)
2بصله تقطع نصف دائرة(شرائح)
2حبه طماطم ناشفه تقطع 4 او 8 قطع طوليه حسب حجمها
للتتبيله:
2بصله متوسطه
1حبة طماطم
2معلقة خل
معلقه مسطرده
بهارات-فلفل اسود-ملح
الطريقه :
1-نضع كل مكونات التتبيله في الخلاط ومعاها كوب ماء ويضرب جيدا ثم يصفى جيدا وتعصريه بايداكى جامد علشان يبقى اللى فاضل في المصفى التفل فقط وناخذ ماء التتبيله فقط وننقعه فيه الفراخ وتترك اطول وقت ممكن وعلى الاقل ساعه انا غالبا بعملها من بالليل او الصبح بدرى واسويها على العصر
2- نحضر طاسه فاضيه وتفضل تيفال ونضعها على النار وننشل الفراخ ونحتفظ بالماء ونضعها قطعه قطعه في الطاسه فارغه بدون زيت او اى حاجه ونقلبها حتى تحمر الفراخ وتاخد شكل الشوى وتحمر قوى ونطلعا في طبق حتى ننتهى من الفراخ كلها دا اهم شي لانه بيحفظ الماء بداخلها وتفضل طريه
3- نحضر الصينيه ونرص الفراخ كلها بعد ما عملتها في الطاسهونضع عليها نص كوب كبير من ماء التتبيله اللى كانت منقوعه فيها ونصه التانى ماء عادى ونضعها على الفراخ وتوضع على الشعله ونخفض النار بعد ما تغلى وتغطى نصف ساعه
وتوضع فى الفرن بعد ذلك ويفضل انه يكون ساخن يعنى ولعيه اول ما تحطيها على الشعله
4- نحضر طاسه ونضع فيه معلقتين زيت ونضع البصل الشرائح والفلفل الالوان شرائح ورشه ملح ويشوح على النار 5دقائق
5- بعد ما الفراخ تتشرب المياه اللي في الصينيه وقبل ما تنشف قوى نضه البصل والفلفل المتشوح وشرائح الطماطم عليها وتدخل الفرن مره اخرى
6- بعد حوالى ربع ساعه هتلاقيها احمرت والحاجات اللى عليها اخدت لون من الفرن والفراخ احمرت خلاص تطفى الفرن وتكون مجهزه فحمه والعه
7- تضعى قطعه ورق المونيوم فى وسط الصينيه وتضعى الفحمه وعليها معلقة زيت وتغطى بسرعه وتتركيها نص ساعه او ممكن اقل حسب وقتك
ملحوظه :لو حسيتى انها نشفت قوى ممكن تزودى ميه بسيط قوى وترشيها عليها وانتى بتحطى الحاجات المتشوحه علشان متنشفش ولا تلزق منك
وتضعيها في سرفيس وبالهنا والشفا وبيكون شكلها تحفه وطعمها رائع لو جربتيها مره مش هتعمليها فراخ الا كدا
وتعملى معاها مكرونه عاديه او مكرونه بالبشاميل وتنفع للعزومات
ولو بتعملى ريجيم جمبها سلطه وتبقى وجبه جميله جدا هتحبيها قوى
اللي تجربها تقولنا الاخبار ايه معاها
ودا شكلها النهائى